2021-03-15eko EGURALDIA/JOXE LANDA

Kaskarkeria apur bat gutxituaz, gaur pixka bat hobea baina ez da asko nabarmenduko ipar haize zitalak laino baxuak arrastaka ekarriz. Giro umela eta hezea batez ere ipar isurialdean. Hegoaldean zertxobait hobea, ostarteak nagusi direla. Isobaren mugimendu txiki batek eragindako aldaketatxoa izango da gaurko hau baina bihar berriro ere kaskartze aldera egingo du. Ipar haizea mugitu, euri lanbroa barreiatuaz lainoak trinkoago eta tenperatura beherago direla, giroa dezente mikaztuko da. Hurrengo egunetan joera hori mantenduko du.