ZUALBE zentrutik Beñat Zubeldiarekin Aurreko irratsaioetan Bioneuroemozio® kontsulta batzuen adibideak ikusi genituen,  kasu praktikoak: zistitis eta sinusitis
kasu batzuk. Gaurkoan, gatazka emozional batekin kontsultara etorritako bezero baten kasua jorratuko dugu, horrela,beste kontsulta-estilo ezberdin baten eredua ezagutzeko. Pertsona honek, bikote arazoak zituen eta aurrekoetan egin dugun bezala, zailtasun hau abiapuntutzat hartu eta ahalik eta informazio gehien ateratzen saiatuko gara, arazo horren atzetik dauden arrazoiak ulertzeko.

Goierri telebistako Ainhoa Ibañezekin, astean zehar izango dituzten berrien errepasoa egin dugu.

Ateria seguru baina zikin samar, zeru sabaian ostarte batzuk agertu arren. Goizean hego haizea suabe baina gero dezente zakartuko da eta ufada gogorrak joko ditu. Horrek asko mikaztuko du giroa. Dotoreziak eta eguratsaren gardentasunak pixka bat irabaziko dute on aldia abian jarriz. Isobarak jita onean eta goi geruzak itxuroso direla, bikain portatuko da eguraldia egun batzuetan goxo eta atsegina mantenduaz. Beraz, gaur kili-kolo antzean baina bihartik egun batzuetarako zeharo ona, hego ukituko haize leunarekin tenperatura igoaz.

Urola Garaiko berdintasun arloko teknikaria den  Esti Ripa Saez de Maturanarekin egin dugu hitzordua. Besteak beste, emakumeen etxeen inguruan eta jabetze eskolatik antolatu dituzten tailer interesgarrien berri eman digu.

Ostiraleroko legez, Amaia Gacia zinema adituak telesail eta film onenen errepasoa egin digu.

Osoa sukaldaritzako Vanessa Blazquezek, Nerabezaroko elikadurari buruzko ezinbesteko gomendioak eman dizkigu.

Apur bat aldatuko da eguraldiaren izaera haizea iparretik jarriz. Lainoak baxutik direla asko nabarmenduko da eguratsaren hezetasuna eta lanbro apur bat barreiatu ere bai batez ere Bizkaia aldean. Oso gutxi izango da hori eta ekialdean isobaren jitak eraginda, txukunago mantenduko da. Beraz, giroak petraltzeko joera agertuko du tenperatura beherantz abiatuta. Arratsaldean goizean baino freskoago ipar haize petralarekin.

Laureano Telleriak , garai bateko kontuak eta konparaketak kontatu dizkigu. Bere mutiko garaitako eskolako kontuak, morroi kontuak, doktrina kontuak…

Gaur ere bikain hodei sare batzuk zeru sabaian mantendu arren. Euri arriskurik bat ere ez eta oso giro ona hego haize leunarekin kostaldea gehiago goxatuaz.