Aste Santuko opor egunen ondoren, gaurkoan Marisa Barrena maistra, psikopedagogoa, euskaltzalea,  feminista eta wikilariaren tartea eskaintzeko aukera izan dugu.
Gaurko egunez jaiotako emakume aitzindari batzuen inguruan hitz egin digu, hauei buruzko xehetasunak eta beraien lorpenak nabarmendu dituelarik.

Edorta Unamunok azken egunotan Urdaibai Bird Center-eko bisitarien joan-etorria etengabekoa izan dela aipatu digu; uneotan euren padura eder horretan udaberriko migrazioan dabiltzan hegazti mordoen ia maila berekoa 😉

Atsedena hartzeko eta baita ere elikatzeko baliatzen dituzte egun hauek hegaztiak; hauetako batzuen inguruan hitz egin digu gaurkoan Edortak.

Gorka Hermosa Nazioarteko Konposizio Lehiaketa sortu dute Txinan.

Tianjin Txinakoa hiria da, herrialdean biztanle gehien dituztenetan bosgarrena eta Gorka Hermosa Nazioarteko Konposizio Lehiaketaren egoitza izango den honetan, mundu osoko akordeoi-jotzaileei aukera emango diete euskal konpositorearen lanak interpretatzeko aukera.

Sari gisa, Hermosak obra bat idatziko du beren beregi irabazlearentzat, eta urtebetez esklusiban jo ahalko du lan hori garaileak; guzti honen inguruan aritu gara Gorkarekin gaur gurean.

Apirilaren 14tik 18ra Segurako Aste Santua ospatuko da. Estudiora etorri zaizkigu antolakuntzako kideak.

Eguraldiaren izaera aldatu egingo da. Haizea iparretik jarrita tenperatura asko jaitsi eta giro umela eta freskoa jarriko da martxan baina euri gutxirekin. Hala ere asko nabarmenduko da petralkeria hori galanki mikaztuaz grazia gutxiko eguraldia izango delarik.

Donostiako San Telmo Museoan erakusketa berria martxan jarri dute: “Jorge Oteiza eta Eduardo Chillida. Dialogoa 50eko eta 60ko urteetan”. Gaurko gurean Javier González de Durana erakusketaren komisarioarekin izan gara.

Gure kolaboratzaile saltseroena 8 egun Walt Disney World-en, Floridan izan da. Bertan bizitakoa kontatu digu gaurko saioan.

Aste Santua ate joka dugu eta gaurkoan Goiturreko zuzendaria den, Niko Osinaldek Goierrin espero den bisiten inguruan eskaini digu informazioa. Goierrin egin eta egongo diren ekitaldi, feria eta bisitarien inguruan hitz egin digu ere.

Legorretako Udalak martxan jarri duen “Herria Bidelagun” programa ezagutu dugu Legorretako Udaleko Gizarte langilea den Itsaso Urretagoienaren eskutik.

Gaur pixka bat narrastuko da haizeak hegotik suabe joko duen arren. Goi geruzetako hodeiak trinkoagoak ekarriko ditu euri zaparradatxoak barreiatuaz. Trumoitsuak izan daitezke erauntsi horiek ater uneekin. Haizeak hegotik jarraituko du bareago eta tenperatura beherago baina asko jaitsi gabe, giroak goxo puntua dezentez mantenduko duelarik. Horrela gaur kaskartze aldera abiatu eta hurrengo egunetan gehiago nabarmenduko da joera hori.